Բենզեմայի հեռանալուց հետո Մադրիդի «Ռեալին» կենտրոնական հարձակվող էր անհրաժեշտ։ Այս տրանսֆերային պատուհանի ընթացքում շատ հարձակվողների անուններ կապեցին «Արքայական» ակումբի հետ, և նրանց թվում էր նաև Վիկտոր Օսիմհենը։ 

«Սերուցքայինների» գլխավոր մարզիչ Կարլո Անչելոտին գովեստի խոսքեր է հնչեցրել նիգերիացու հասցեին և միևնույն ժամանակ նշել, թե ինչու «Ռեալը» չի միացել նրա տրանսֆերի համար մղվող պայքարին։

«Օսիմհենը Եվրոպայի ուժեղագույն հարձակվողների թվում է, բայց մենք նրա մասին նույնիսկ չենք էլ մտածել։ Բանն այն է, որ մենք որոշեցինք կոմպենսացնել Բենզեմայի հեռանալը Բելինգեմի տրանսֆերով». նշել է Անչելոտին։

Առայժմ Ջուդը բավական լավ է փոխարինում Բենզեմային։ Լա Լիգայի մեկնարկային երկու տուրերում անգլիացին դարձել է 3 գոլի և 1 գոլային փոխանցման հեղինակ։ 

«Ռեալի» շարքերը ամռանը համալրեց նաև Խոսելուն, սակայն վերջինս առայժմ չի համարվում մեկնարկային կազմի ֆուտբոլիստ։ «Արքայական» ակումբ վերադառնալուց հետո իսպանացին իր միակ գոլը խփել է «Մանչեսթեր Յունայթեդի» դեմ կայացած ստուգողական խաղում։

Los Merengues, Realmadrid.am