Հոդվածներ

Զինեդին Զիդանի մամուլի ասուլիսը՝ «Ուեսկայի» դեմ խաղից հետո
01.11.2020
1223 0

Լա լիգայի 8-րդ տուրում «Ուեսկայի» նկատմամբ տոնած հաղթանակից հետո «Ռեալի» գլխավոր մարզիչ Զինեդին Զիդանը ներկայացավ «Ալֆրեդո դի Ստտեֆանո» մարզադաշտի մամուլի սրահ ու պատասխանեց լրագրողների հարցերին:

Հանդիպման մասին.

«Այս խաղը կարծես եզրափակիչ լիներ մեզ համար: Առաջին խաղակեսում որոշ գոլային պահեր ստեղծեցինք, ու մնում էր խփել առաջին գնդակը:

Այնուհետև, հանդիպումն ավելի հեշտ դասավորվեց: Չէի ասի՝ իդեալական ենք խաղացել, սակայն 4 գնդակ խփելն  ուրախալի փաստ է: Երբեմն մեզ քննադատում են՝ մատնանշելով քիչ գոլերը»: 

Վալվերդեի մասին.

«Զարմացած չեմ նրա խաղից: Վալվերդեն շատ է աշխատում, ու արդյունքը երկար սպասեցնել չի տալիս: Շատ կարևոր է, որ այդ դիրքի ֆուտբոլիստը գոլեր է հեղինակում: Ուրախ եմ նրա համար»:

Ազարի մասին.

«Գոհ եմ էդենի գործողություններից: Ոչ վաղ անցյալում նա կարողանում էր ընդամենը 20 րոպե անցկացնել խաղադաշտում, իսկ այսօր դուրս էր եկել մեկնարկային կազմում: Լավ գիտենք Ազարի որակները: Ուրախ եմ, որ կարողացավ օգուտ բերել թիմին»:

Կազմի ընտրության մասին.

«Փոփոխություններ չէի արել՝ նաև հաշվի առնելով «Ինտերի» հետ առաջիկա հանդիպումը: Դեռևս չգիտեմ՝ ինչպիսին է լինելու այդ խաղի մեկնարկային կազմը: Ներկայում ցանկանում ենք հանգստանալ ու վայելել հաղթանակը»:

Fanat, Realmadrid.am


Ամենակարդացված