Ի պատասխան Լա Լիգայի նախագահ Խավիեր Տեբաս Մեդրանոյի հայտարարությունների՝ «Ռեալ Մադրիդ» ֆուտբոլային ակումբը ցանկանում է հայտարարել հետևյալը.

Մեր ակումբն անընդունելի է համարում, որ Լա Լիգայի նախագահն օգտագործում է իր պաշտոնական դիրքը, որպեսզի շարունակի նվաստացնել և հարձակվել «Ռեալ Մադրիդի» վրա այնպես, ինչպես նա անում է իր յուրաքանչյուր հանրային հայտարարության մեջ։ Խորապես մտահոգիչ է, որ մի մարդ, ով պատասխանատու է Լա Լիգայի բոլոր ակումբների շահերը ներկայացնելու և պաշտպանելու համար, շարունակում է տարված մնալ «Ռեալ Մադրիդով»՝ մեր ակումբը պարբերաբար դարձնելով իր հանրային հարձակումների մշտական թիրախը։

Նրա վերջին հայտարարությունը հատկապես լուրջ է և անհասկանալի, անվայել պատասխանատու ղեկավարին, քանի որ նա այն արել է թվային հրատարակությունում՝ անկախ լրագրողի հոդվածը մեկնաբանելիս։ Այնուամենայնիվ, նա հակադարձում է մեր ակումբին՝ հասնելով նույնիսկ մեր մարզական ռազմավարությունը գնահատելուն, ինչը լիովին աբսուրդային է և անպատասխանատու։

Ապշեցուցիչ է, որ Լա Լիգայի նախագահն իր ժամանակը և անձնական հարթակները նվիրում է «Ռեալ Մադրիդին» հրապարակայնորեն վարկաբեկելուն, փոխանակ իր դիրքն օգտագործելու այն կառույցների հանդեպ վստահություն ձևավորելու համար, որոնք պատասխանատու են մրցաշարի անկողմնակալությունն ապահովելու համար։ Այդպիսով նա շարունակում է վնասել մեր լիգայի և իսպանական ֆուտբոլի հեղինակությանը ողջ աշխարհում։

Հաշվի առնելով այս անվայել և տևական վարքագիծը՝ մենք կարծում ենք, որ Իսպանիայի պրոֆեսիոնալ ֆուտբոլին շտապ անհրաժեշտ է առաջնորդ, ով ունակ կլինի կառավարել այն և զարգացնել դրա ողջ ներուժը՝ միաժամանակ պահպանելով չեզոքության հիմնարար սկզբունքը։ Անհրաժեշտ է մեկը, ով հասկանում է իր դերի բնույթը, քանի որ Լա Լիգայի նախագահը մրցաշարի սեփականատերը չէ, այլ կառավարիչ, որը ծառայում է այն կազմող և իրենց ղեկավարությունը վստահած ակումբներին։ Ակումբներին անհրաժեշտ է մեկը, ով այս առաքելությանը կծառայի ազնվությամբ և բարեխղճությամբ։

Los Merengues, Realmadrid.am