Լուիս Կամպոսը՝ փարիզյան ակումբի մարզական խորհրդատուն, արդեն տևական ժամանակ է, ինչ ուշադիր հետևում է «Ռեալ Մադրիդի» երիտասարդ կենտրոնական պաշտպանին։

ՊՍԺ-ն դիտարկում է «Ռեալին» որպես ուժեղացման աղբյուր, ընդ որում՝ ոչ առաջին թիմին։ Փարիզյան ակումբի հայացքն ուղղված է «Կաստիլյայի» (Ռեալի երկրորդ թիմի) կողմը, մասնավորապես՝ Ժոան Մարտինեսին։ Երիտասարդ կենտրոնական պաշտպանը հայտնվել է նրանց տեսադաշտում՝ պաշտպանությունը թարմացնելու նպատակով։ Սա լուրջ խաղադրույք է ապագայի վրա՝ «Լա Ֆաբրիկայի» («Ռեալի» ակադեմիայի) մեծագույն գոհարներից մեկի հետ։ 18-ամյա պաշտպանը դեռ պաշտոնական նորամուտը չի նշել «Ռեալի» առաջին թիմում, սակայն նա այն սաներից է, ովքեր ամենամեծ շանսերն ունեն մոտ ապագայում տեղ զբաղեցնել հիմնական կազմի հանդերձարանում։ Այս հետաքրքրությունը նկատելի է նաև Վալդեբեբասից դուրս, որտեղ շատ թիմեր արդեն նշանառության տակ են առել նրա անունը։

Լուիս Կամպոսն արդեն «պաշտոնականացրել» է հետաքրքրությունը խաղացողի նկատմամբ և քաջատեղյակ է մադրիդյան ակումբի հետ նրա պայմանագրային մանրամասներին։ Նպատակը նրան Լուիս Էնրիկեի տրամադրության տակ դնելն է։ Սակայն «Ռեալը» լավ պաշտպանել է իր սանին. չափահաս դառնալուն պես Մարտինեսը երկարաձգել է պայմանագիրը մինչև 2029 թվականը՝ 150 միլիոն եվրո հրաժարագնով։ Այս առումով «սերուցքայինները» կարող են հանգիստ լինել՝ առանց բանակցությունների խաղացողը չի կարող հեռանալ։

Միլիոնավոր եվրոների հասնող տրանսֆեր

Բանակցությունների անհրաժեշտությունը չի անհանգստացնում ՊՍԺ-ին։ Եթե նրանք որոշեն գործել, ապա առաջարկը կլինի շատ բարձր՝ համապատասխան «Լա Ֆաբրիկայի» աստղին ձեռք բերելու հավակնությանը։ Ի տարբերություն սովորական պրակտիկայի, երբ ակադեմիայի սաները վաճառվում են իրավունքների միայն 50%-ով և հետգնման հնարավորությամբ (ինչպես Վիկտոր Մունյոսի կամ Նիկո Պասի դեպքում), ՊՍԺ-ն կներկայացնի առաջարկ՝ խաղացողին ամբողջությամբ գնելու համար։ Եթե «Ռեալը» վաճառի նրան, ապա վերջնականապես կկորցնի։

ՊՍԺ-ն վաղուց հրաժարվել է «գալակտիկոսների» պլանից (Նեյմար, Մեսսի, Ռամոս)։ Լուիս Կամպոսի և Լուիս Էնրիկեի գալուստով ակումբը որդեգրել է նոր քաղաքականություն՝ աստղեր աճեցնել, այլ ոչ թե գնել։ Ժոան Մարտինեսը լիովին համապատասխանում է այս ռազմավարությանը։

«Ռեալի» խնդիրները պաշտպանների հետ

Գործարքը բարդացնում է նաև «Ռեալի» ներկայիս վիճակը։ Ինչպես հայտնել էր MARCA-ն, Միլիտաոյի վնասվածքն ամեն ինչ տակնուվրա է արել։ Բրազիլացին, ով Հաուսենի հետ միասին համարվում էր պաշտպանության ապագա հենասյունը, երկար ժամանակով դուրս է մնացել շարքից։

Այս իրավիճակը ստիպում է «Ռեալին» վերանայել իր ծրագրերը։ Ալաբան կհեռանա, Ռյուդիգերի պայմանագրի հարցը բաց է, և ակումբը պետք է որոշի՝ ինչ անել ակադեմիայի այն պաշտպանների հետ, ովքեր պատրաստ են մեծ ֆուտբոլին։ Այստեղ են հայտնվում Ագուադոն, Վալդեպենյասը և, իհարկե, Ժոան Մարտինեսը։ «Ռեալը» նրանց կարիքն ունի թիկունքն ապահովելու համար և կանաչ լույս չի վառի նրանց հեռանալու համար, քանի դեռ չի հստակեցրել առաջին թիմի պաշտպանների վերջնական ցանկը։