Առաջին խաղում հիանալի հանդես գալով՝ «Բավարիայի» դարպասապահն ունի «սերուցքայինների» հետ մենամարտերի ու պատմությունների հարուստ անցյալ:

Մարտի 27-ին բոլորեց Մանուել Նոյերի 40 տարին, իսկ քառորդ եզրափակչի առաջին խաղում նա արտակարգ հանդիպում անցկացրեց: «Բավարիան» «Բեռնաբեուում» խաղաց շատ լավ, և այն 1։2 հաշիվը, որով թիմը պատրաստվում է պատասխան խաղին սեփական հարկի տակ, մեծապես պայմանավորված է թիմի ավագի և դարպասապահի սեյվերով:

Նման մարզավիճակ նրա կարիերայի այս փուլում ոչ–ոք չէր սպասում: Հատկապես այն շրջաններից հետո, որոնք թվում էր, թե ազդարարում էին նրա վերջը՝ արդյունավետության անկում, լուրջ վնասվածքներ և նույնիսկ այնպիսի տարօրինակ դեպք, ինչպիսին էր ոլոքի կոտրվածքը Կատարի Աշխարհի առաջնությունից հետո դահուկ սահելիս: Սակայն 2026-ի ապրիլին Նոյերը ներկայանում է որպես իր թիմի գլխավոր հենասյուներից մեկը՝ կիսաեզրափակիչ հասնելու և իր 3–րդ Չեմպիոնների լիգայի գավաթը նվաճելու երազանքի ճանապարհին:

Կիսաեզրափակչից նրան բաժանում է «Ռեալը»՝ թիմ, որը նրան պարգևեց առաջին մեծ ուրախությունը Չեմպիոնների լիգայում, իսկ հետո՝ մի շարք հիասթափություններ: Այս ուրբաթ՝ ապրիլի 17-ին, լրանում է 14 տարին Գելզենկիրխենից սերող դարպասապահի և «Արքայական ակումբի» առաջին ճակատամարտից:

Մի արտահայտություն, որ նա չէր ասել, և մեծ աղմուկ

2012-ի Չեմպիոնների լիգայի կիսաեզրափակիչը դարձավ Նոյերի և «Ռեալի» պատմության սկիզբը: Երկու խաղերն էլ ավարտվեցին 2։1 հաշվով, և Մյունխենի եզրափակչի ուղեգիրը որոշվեց 11-մետրանոցներով: Կրիշտիանուի, Կակայի և Սերխիո Ռամոսի վրիպումներն ավելի ծանր նստեցին, քան Կրոսինն ու Լամինը: Մադրիդի պաշտպանը գնդակն ուղարկեց երկինք:

Ռամոսի հարվածը մեծ վեճ առաջացրեց: Հարցին, թե արդյոք նա գիտեր, որ Ռամոսը սիրում է այդքան բարձր հարվածել, Նոյերը կարճ պատասխանել էր՝ «ոչ»: Սակայն մամուլում հայտնվեց այլ վերնագիր. «Չգիտեի, որ Ռամոսը սիրում է 11-մետրանոցներն այդքան բարձր հարվածել»: Շաբաթներ անց, երբ «Բավարիան» եզրափակչում պարտվեց «Չելսիին», Ռամոսը Twitter-ում պատասխանեց. «Ի դեպ, չգիտեի, որ Նոյերն այսքան «լավ» է եզրափակիչներում: Մյուս տարի կփորձես: Միշտ խոնարհ եղիր, չեմպիոն»:

Ջախջախում Մյունխենում

Երկու տարի անց կիսաեզրափակիչը նորից խաչեց նրանց ճանապարհները: Անչելոտիի «Ռեալը» Բենզեմայի գոլի շնորհիվ առավելություն ուներ: Գվարդիոլայի «Բավարիայի» ռևանշի փորձն ավարտվեց գերմանական աղետով. Ռամոսի երկու գլխով հարվածները և Կրիշտիանուի երկու գոլերը մադրիդցիներին տարան դեպի «Դեսիմա» (10-րդ գավաթ):

Ամենավիճահարույցը

2016/17 մրցաշրջանի քառորդ եզրափակչում Անչելոտին արդեն մարզում էր «Բավարիան»: «Ռեալի»՝ Մյունխենում 2։1 հաշվով հաղթանակից հետո, գերմանացիները Մադրիդում խաղը տեղափոխեցին լրացուցիչ ժամանակ: Սակայն Արտուրո Վիդալի հեռացումից հետո «Բավարիան» տեղի տվեց Կրիշտիանուի և Ասենսիոյի գոլերի առջև (4։2):

Վնասվածքը և Կեյլորը որպես հերոս

2017/18 կիսաեզրափակչում Նոյերը բացակայում էր վնասվածքի պատճառով: Նրան փոխարինած Ուլրայխը կոպիտ սխալ թույլ տվեց՝ գոլ նվիրելով Բենզեմային: Չնայած Մյունխենում 2։1 հաշվով հաղթանակին, «Ռեալը» պատասխան խաղում սարսափելի ճնշման ենթարկվեց, որտեղ միայն Կեյլոր Նավասի հերոսական սեյվերը փրկեցին մադրիդցիներին (2։2):

Եվ հանկարծ՝ Խոսելու

2024-ի մայիսի 8-ին «Բավարիան» երկու քայլ էր հեռու եզրափակչից: Դևիսի գոլը և Նոյերի անառիկ խաղը «Ռեալին» դրել էին անելանելի վիճակի մեջ: Սակայն 88-րդ րոպեին Նոյերը ձեռքից բաց թողեց ամենապարզ գնդակներից մեկը, և Խոսելուն այն ուղարկեց ցանցը: Երկու րոպե անց նույն հարձակվողը հաշիվը դարձրեց 2։1:

Ոչ մի «չոր» հանդիպում

Մանուել Նոյերը Չեմպիոնների լիգայի պատմության մեջ ամենաշատ «չոր» հանդիպումներ անցկացրած դարպասապահն է (58 խաղ 148-ից): Սակայն դրանցից և ոչ մեկը չի եղել «Ռեալի» դեմ:

Մադրիդյան թիմը միակն է Նոյերի կարիերայում, որի դեմ նա խաղացել է 9 կամ ավելի անգամ և ոչ մի անգամ չի կարողացել դարպասն անառիկ պահել:

9 խաղում Նոյերը «Ռեալից» ընդունել է 19 գոլ:

Գլխավոր «դահիճը» Կրիշտիանու Ռոնալդուն է (9 գոլ): Նրան հաջորդում են Ռամոսը, Խոսելուն և Վինիսիուսը (2-ական գոլ):