«Ալյանց Արենայում» կայանալիք «մենամարտը» կարող է որոշել նաև Չեմպիոնների լիգայի մրցաշրջանի լավագույն հարձակվողի տիտղոսակրին:

Թվում էր, թե Կիլիան Մբապեն արդեն իր ձեռքում ունի «Պիչիչիի» (լավագույն ռմբարկուի) և Չեմպիոնների լիգայի լավագույն գոլահարի մրցանակները՝ խմբային փուլում խփելով ոչ ավել, ոչ պակաս 13 գոլ: Սակայն ֆրանսիացու տեմպի անկումը, հատկապես ծնկի վիճահարույց վնասվածքի պատճառով, կանգնեցրեց նրան: Փլեյ-օֆֆ փուլի մեկնարկից ի վեր նա խփել է ևս մեկ գոլ՝ «Բեռնաբեուում» կայացած «Բավարիայի» դեմ խաղում՝ իր հաշվին գրանցելով 14 գոլ 10 խաղում: Վատ արդյունք չէ, ամեն դեպքում, բայց կա մի հարձակվող, ով չի հանձնվում. Հարի Քեյնը 10 խաղում խփած 11 գոլով արդեն ընդամենը երեք գոլի տարբերությամբ հետապնդում է նրան:

Այս մենամարտի հաղթողը, հավանաբար, կդառնա Չեմպիոնների լիգայի լավագույն ռմբարկուն: Եթե «Ռեալին» հաջողվի քամբեք իրականացնել, հավանական է, որ Կիլիանի ճանապարհը կհարթվի: Բայց եթե «Բավարիան» պահպանի առաջին խաղի իր առավելությունը, սպառնալիքը շատ իրական կլինի: Անգլիացին ապրում է իր կարիերայի լավագույն պահերից մեկը՝ 41 խաղում խփելով 49 գոլ, որոնցից 31-ը՝ Բունդեսլիգայում, ինչը նրան դարձնում է Մբապեի հստակ հաջորդը «Ոսկե խաղակոշիկի» համար պայքարում:

Դեմ առ դեմ «Ալյանցում» և «Ոսկե գնդակը»

Նրանց միջև կան նաև այլ հակամարտություններ: Երկուսն էլ այս մրցաշրջանի «Ոսկե գնդակի» հավակնորդներ են, և նա, ով առաջ կանցնի, անկասկած ավելի շատ միավորներ կվաստակի: Քեյնը տարիներ շարունակ փնտրում է փառքը՝ ոչ միայն իր առաջին Չեմպիոնների լիգայի գավաթը, այլև աշխարհի լավագույն ֆուտբոլիստի կոչումը, և 32 տարեկանում այս հնարավորությունը նրա համար գուցե վերջիններից մեկն է: Կիլիանն այս մրցաշրջանը սկսեց սպասվածի պես, բայց տեսավ, թե ինչպես նրա ցուցանիշներն այլևս առաջվա պես չեն աճում: Լա Լիգայում նրա երկրորդ «Պիչիչին» թվում էր անխուսափելի, սակայն «Մալյորկայի» արտակարգ հարձակվող Մուրիքին մոտեցել է նրան ընդամենը երկու գոլի տարբերությամբ:

«Ոսկե գնդակի» համար կարևոր կլինի նաև Աշխարհի առաջնությունը, բայց ակումբային մրցաշրջանը նույնպես հսկայական կշիռ ունի: Դա վերաբերում է նաև այլ թեկնածուների, ինչպիսիք են Լամինը կամ Մայքլ Օլիսեն՝ Կիլիանի թիմակիցը Ֆրանսիայի հավաքականում:

Մբապեի համար Չեմպիոնների լիգան մնացել է միակ փրկօղակը՝ Լա լիգայում և գավաթում կրած ձախողումներից հետո: Անցյալ տարի նա բավականին լավ ցուցանիշներ ունեցավ «Ռեալում» իր առաջին մրցաշրջանի համար, սակայն դա չարտացոլվեց թիմային տիտղոսների տեսքով: Չորեքշաբթի օրը «Ալյանցում» նա հնարավորություն ունի հարված հասցնելու: Եթե նա «Ռեալի» հետ միասին չհասնի հաղթանակի, նրա երկրորդ մրցաշրջանը նորից դառն ու քաղցր համ կունենա. լավ անհատական թվեր, բայց վատ թիմային արդյունքներ:

Անկասելի անգլիացին

Որպես «Բավարիայի» հարձակման գլխավոր առաջամարտիկ՝ Քեյնը առանցքային դեր է խաղացել ակումբի նոր ռեկորդի հարցում: Գերմանական թիմը հերթական ջախջախիչ հաղթանակը տարավ Բունդեսլիգայում և գերազանցեց պատմական ռեկորդը: «Սանկտ Պաուլիի» նկատմամբ 5։0 հաշվով հաղթանակից հետո «Բավարիան» լիգայում խփած գոլերի քանակը հասցրեց 105-ի՝ փշրելով 101 գոլի ռեկորդը առաջնության ավարտից 5 տուր առաջ: Անգլիացու 31 գոլերին միացել են նաև Լուիս Դիասը (15 գոլ) և Մայքլ Օլիսեն (12 գոլ)՝ օգնելով գերազանցել 70-71 մրցաշրջանի ցուցանիշը: