Մադրիդի «Ռեալն» ՈւԵՖԱ-ից ստացել է ամենամեծ գումարը Չեմպիոնների լիգայի անցած մրցաշրջանի համար։

ՈւԵՖԱ-ի ֆինանսական հաշվետվության համաձայն՝ մադրիդյան գրանդը, որը հաղթեց ՉԼ-ի 2023/24 մրցաշրջանում, ստացել է մոտ 139 միլիոն եվրո, որից 14 միլիոն եվրոն կազմում է հեռուստատեսային իրավունքների վաճառքից ստացված եկամուտը։

Պարգևավճարների չափով երկրորդ տեղը զբաղեցրել է ՊՍԺ-ն (122,4 միլիոն եվրո), իսկ երրորդ տեղում ՉԼ-ի եզրափակիչի մասնակից Դորտմունդի «Բորուսիան» է (120 միլիոն եվրո)։

«Մանչեսթեր Սիթին» ՈւԵՖԱ-ից ստացել է 110,5 միլիոն եվրո Չեմպիոնների լիգայում իր ելույթների և 4,5 միլիոն եվրո՝ Եվրոպայի Սուպերգավաթի խաղում «Սևիլիայի» հետ մրցելու համար։ «Բարսելոնայի» եկամուտը կազմել է 98 միլիոն եվրո։

«Մանչեսթեր Յունայթեդը», որը խմբային փուլում զբաղեցրել էր վերջին տեղը, վաստակել է մոտ 61 միլիոն եվրո։ Նախորդ մրցաշրջանի Չեմպիոնների լիգայի մասնակիցների շարքում ամենաքիչը վաստակել է «Անտվերպենը»՝ 22 միլիոն։

Եվրոպայի լիգայի մասնակիցների մեջ ամենամեծ եկամուտն ունեցել է «Բայերը», որը պարտվեց «Ատալանտային» եզրափակիչում. լևերկուզենյան ակումբի եկամուտը կազմել է 41,2 միլիոն։ Բերգամոյի ակումբն ստացել է մոտ 34 միլիոն եվրո։

Եվրագավաթային մրցաշարերի ընդհանուր պարգևավճարային ֆոնդը 2023/24 մրցաշրջանում գերազանցել է 2,2 միլիարդ եվրոն։ Ընթացիկ մրցաշրջանում նոր ձևաչափի շնորհիվ այն կավելանա 25%-ով։

Fanat, Realmadrid.am