Իսպանիայի սուպերգավաթի եզրափակիչում Մադրիդի «Ռեալը» Սաուդյան Արաբիայում ուժերը կչափի «Բարսելոնայի» հետ (12.01.2025, 23:00):

«Ռեալի» գլխավոր մարզչի նախախաղային մամուլի ասուլիսը

«Մեր բոլոր ֆուտբոլիստները պատրաստ են վաղվա եզրափակչին, այդ թվում՝ Բելինգեմը։ Ամեն դեպքում, մեկնարկային կազմում անակնկալներ չեն լինի»։

«Մենք պետք է հիշենք վերջին «Էլ Կլասիկոն», որտեղ պարտվեցինք։ Մենք բավականին հստակ վերլուծեցինք այդ հանդիպումը, ուստի վաղը կփորձենք կրկնել այն, ինչ մեզ մոտ լավ ստացվեց, և խուսափել նույն սխալներից։ «Էլ Կլասիկոն» միշտ էլ առանձնահատուկ խաղ է, և հաշվի առնելով, որ սա եզրափակիչ է, ճնշումը բոլորիս վրա ավելի մեծ կլինի։

Պաշտպանությունն առաջիկա խաղի կարևորագույն գործոններից մեկն է։ Եթե մենք կարողանանք լավ պաշտպանվել, մեր հաղթելու հնարավորությունները կմեծանան։ Ինչևէ, մենք շատ վստահ ենք մեր ուժերի վրա, թեև «Բարսելոնայի» դեմ խաղերը միշտ էլ դժվար են, քանի որ նրանք շատ լավ պատրաստված թիմ են։ Բայց վաղը նաև կատալոնացիների համար դժվար կլինի։

«Բարսելոնայի» կողմից խաղից դուրս վիճակի թակարդները նույնպես վաղվա խաղի տակտիկական կարևոր բաղադրիչն են։ Մենք ուսումնասիրել ենք դրանք և աշխատել դրանց վրա»։

«Իսպանիայի սուպերգավաթը նվաճելը միշտ մեզ տալիս է բարոյական ուժ և վստահություն մրցաշրջանի կեսին։ Համոզված եմ, որ վաղը մենք շատ լավ հանդես կգանք։

Այնուամենայնիվ, եթե վաղը պարտվենք, մրցաշրջանը դրանով չի ավարտվի։ Սա եզրափակիչ է, մենք շատ մոտ ենք հերթական տիտղոսին և տրամադրված ենք դրական։ Բայց հասկանում եմ, որ ֆուտբոլում կարող է ամեն ինչ պատահել, հատկապես, երբ ձեր մրցակիցը «Բարսելոնան» է»։

 «Ներկայումս մենք չենք մտածում 7 տիտղոս նվաճելու մասին, քանի որ, օրինակ, ԱԱԱ-ն (Աշխարհի ակումբային առաջնություն) տեղի կունենա հուլիսին, երբ սովորաբար բոլորը հանգստի մեջ են»։

«Եթե Օլմոն մասնակցի վաղվա «Էլ Կլասիկոյին» և դառնա դրա գլխավոր հերոսը, ուրեմն մենք չկարողացանք կանգնեցնել հիանալի ֆուտբոլիստի։ Ամեն դեպքում, եթե նա դուրս գա խաղադաշտ, մենք կփորձենք նրան հնարավորինս լավ կանգնեցնել, քանի որ Դանին ունի շատ լավ հմտություններ»։