Ինչպես ավելի վաղ արդեն հայտնել ենք, Մադրիդի «Ռեալի» բրազիլացի հարձակվող Վինիսիուս Ժունիորը ՖԻՖԱ–ի The Best մրցանակաբաշխության ժամանակ ճանաչվել է 2024 թվականի լավագույն ֆուտբոլիստ։

Քվեարկության արդյունքում նա գերազանցել է Ջուդ Բելինգեմին, Կիլիան Մբապեին, Դանիել Կարվախալին, Ֆեդերիկո Վալվերդեին (բոլորը «Ռեալ Մադրիդ»), Լիոնել Մեսսիին («Ինտեր Մայամի»), Լամին Յամալին («Բարսելոնա»), Էրլինգ Հոլանդին, Ռոդրիին (երկուսն էլ՝ «Մանչեսթեր Սիթի»), Ֆլորիան Վիրցին («Բայեր») և կարիերան ավարտած Թոնի Կրոսին։

«Արքայական ակումբը» գլխավորող Կառլո Անչելոտին, իր հերթին, ճանաչվեց 2024 թվականի տարվա լավագույն մարզիչ։

2023/24 մրցաշրջանում «Ռեալը» իտալացի մասնագետի գլխավորությամբ դարձել է Իսպանիայի չեմպիոն և հաղթել Չեմպիոնների լիգան։

Մրցանակը հանձնելիս հաշվի է առնվել 2023 թվականի օգոստոսի 21–ից մինչև 2024 թվականի օգոստոսի 10–ն ընկած ժամանակահատվածը։ Քվեարկությանը մասնակցել են հավաքականների ավագներն ու մարզիչները, երկրպագուներն ու ԶԼՄ–ների ներկայացուցիչները։

ՏԱՐՎԱ ԽՈՐՀՐԴԱՆՇԱԿԱՆ ՀԱՎԱՔԱԿԱՆԸ

«Ռեալի» ֆուտբոլիստներից տեղ են գտել Վինիսիուս Ժունիորը, Թոնի Կրոսը, Ջուդ Բելինգեմը, Անտոնիո Ռյուդիգերը և Դանի Կարվախալը։