Պեպ Գվարդիոլայի հեռանալը, եթե վերջին պահին կտրուկ շրջադարձ չլինի, բացում է մի դուռ, որը տարիներ շարունակ լիովին փակ էր «Մադրիդի» համար:

Ռոդրիգո Հերնանդեսը (29 տարեկան, Մադրիդ) արդեն երկար ժամանակ է, ինչ հանդիսանում է «Ռեալ Մադրիդի» մեծ ու անհնարին երազանքը: Իսկ Թոնի Կրոսի հեռանալուց հետո՝ էլ ավելի շատ: Ամեն տրանսֆերային պատուհանի ժամանակ նրա անունը գրեթե իներցիայով հայտնվում էր Վալդեբեբասի գրասենյակներում՝ որպես «սերուցքայինների» կենտրոնական գոտին կարգավորելու կատարյալ լուծում: Հիմա, երկար ժամանակի ընթացքում առաջին անգամ, իրավիճակը փոխվել է: Եվ աղմուկը նորից բարձրանում է ավելի մեծ ուժով, քան երբևէ:

«Մանչեսթեր Սիթիից» Պեպ Գվարդիոլայի հնարավոր հեռանալը, եթե վերջին պահին կտրուկ շրջադարձ չլինի, փոխել է մի սցենար, որն անփոփոխ էր թվում: Որովհետև տարիներ շարունակ Անգլիայում Ռոդրիի մնալը ուղղակիորեն կապված էր կատալոնացի մասնագետի կերպարի հետ: Թե՛ ակումբի, թե՛ հենց ֆուտբոլիստի համար ելքի դուռը լիովին փակ էր մնում: Գրեթե առանց ճաքերի:

Դուռը, որը բացում է Պեպը

Պեպը ոչ միայն դարձրեց Ռոդրիին պատմության լավագույն «Սիթիի» առանցքը, այլև կերտեց նրա կարիերան հենց առաջին օրվանից և նրան հանձնեց թիմի բացարձակ հսկողությունը: Նրա ղեկավարությամբ իսպանացի կիսապաշտպանը վերածվեց այս ահարկու թիմի կողմնացույցի, այն աստիճանի, որ վնասվածքի պատճառով նրա բացակայությունը անցյալ մրցաշրջանի մեծ մասում «Սիթիին» թողեց առանց կողմնորոշման:

Գվարդիոլայի և Ռոդրիի միջև միշտ եղել է հատուկ կապ: Մի հարաբերություն՝ հիմնված փոխադարձ հիացմունքի, ֆուտբոլային հարգանքի և խաղն ու հանրային դրսևորումը շատ նման ձևով հասկանալու վրա: Զսպվածություն, լուռ առաջնորդություն և տակտիկական մոլուցք: Տարիներ շարունակ նրանցից մեկի անունը տալը գրեթե նույնն էր, ինչ մյուսինը տալը: Միշտ ձեռք ձեռքի տված:

Կապը, որը կանգնեցրեց ամեն ինչ

Այնուամենայնիվ, թե՛ «Սիթին», թե՛ հենց Պեպը միշտ հասկացել են, որ էմոցիոնալ ու ընտանեկան գործոնը ինչ-որ պահի կարող է իր դերը խաղալ իսպանացի խաղացողի համար: Եվ հիմա, նրա մեծ մենթորի հնարավոր հեռանալով, իրավիճակը փոխվել է: Եվ Ռոդրիին սկսում է դուր գալ Իսպանիա վերադառնալու մտահղացումը: Դե, իրականում նրան դա միշտ էլ դուր է եկել:

«Ռեալ Մադրիդում» կարծում են, որ եթե համապատասխան հանգամանքները ստեղծվեն, գործարքը կարող է իրագործելի դառնալ: Ակումբը վաղուց սիրահարված է նրա պրոֆիլին՝ հեղինակություն, տակտիկական խելք, հավասարակշռություն և ամեն ինչ վերահսկելու կարողություն: Եվ ֆուտբոլիստը շատ դրական կնայեր սպիտակ մարզաշապիկը կրելուն: Չնայած դա հեշտ գործարք չի լինի:

Կյանքի զուգադիպությամբ, Ռոդրիի և Գվարդիոլայի ճանապարհները միշտ ձեռք ձեռքի են գնացել... մի բան, որը կարծես չի փոխվում նաև պատմության այս ավարտին: Երկուսն էլ պայմանագիր ունեն մինչև 2027 թվականը, և «Սիթին» չի դիտարկում հեշտ հեռացում իր ամենակարևոր խաղացողներից մեկի համար: Չնայած իսպանացի կիսապաշտպանի ցանկությունը, անշուշտ, ամեն ինչ կհեշտացներ:

Այսպիսով, Ռոդրիի և «սերուցքայինների» միջև գոյություն ունի հարգալից հարաբերություն, որն ունեցել է իր վայրիվերումները: Սպիտակների հետաքրքրությունը գալիս է դեռ «Ատլետիկոյում» նրա խաղալու ժամանակաշրջանից, թեև այն ժամանակ ռոխիբլանկոների մերժումը և Գվարդիոլայի հայտնվելը ի վերջո հեռացրին ցանկացած հնարավորություն: Նույնիսկ «Ոսկե գնդակի» դրվագը թողեց որոշակի ինստիտուցիոնալ տարաձայնություններ գալա երեկոյին «Մադրիդի» բացակայությունից հետո, թեև Ֆլորենտինո Պերեսը հետագայում կարողացավ նվազեցնել լարվածությունը՝ քայլ կատարելով դեպի իսպանացի ֆուտբոլիստը:

Ղեկի շրջադարձ

Հիմա, երբ «Մադրիդն» ամենաշատն ունի իր կենտրոնական գոտին վերակառուցելու կարիք, Ռոդրիի անունը նորից հայտնվում է բեմում ավելի մեծ ուժով, քան երբևէ: Այդ ընթացքում ֆուտբոլիստը պահպանում է հանգստությունը: Նրա առաջնահերթությունը Պրեմիեր լիգայում մրցաշրջանն ավարտելն է և Իսպանիայի հավաքականի հետ Աշխարհի առաջնության վրա կենտրոնանալը: Բայց երաժշտությունն արդեն հնչում է: Եվ «Բեռնաբեուում» այն վաղուց են լսում:

Ռոդրիի գալուստը կնշանակեր շատ ավելին, քան պարզապես մեծ տրանսֆեր: «Ռեալ Մադրիդը» պետք է ուղղի չափազանց շատ խնդիրներ իր կենտրոնական գոտում: Տակտիկական հավասարակշռության պակաս, պաշտպանողական թուլություն և խաղի կառուցման ընթացքում քիչ սահունություն: Կրոսից, Մոդրիչից և Կազեմիրոյից կազմված պատմական եռանկյան աստիճանական անհետացումը թողեց վերքեր, որոնք դեռ ամբողջությամբ չեն փակվել: Եվ հենց այստեղ է հայտնվում Ռոդրիի կերպարը:

Ունենալով ավելի քան 1,90 մետր հասակ՝ նա համադրում է ֆիզիկական ուժը, տակտիկական խելքը և արտոնյալ տեխնիկան: Պաշտպանվում է, կարգավորում է, դադար է տալիս և լավացնում է բոլորին, ովքեր խաղում են իր շուրջը: Ամենալավ ընկերակիցը ցանկացած ֆուտբոլիստի համար: Նա միշտ առաջարկում է փոխանցման գիծ, հազվադեպ է կորցնում դիրքը և գրեթե երբեք սխալ որոշում չի կայացնում ճնշման տակ: Բացի այդ, Ռոդրին լավագույնն է աշխարհում տեմպը պահելու և դիրքային ճիշտ ընտրության (կանխատեսման) շնորհիվ գնդակներ խլելու հարցում. նա գիտի, թե երբ արագացնել գնդակի շրջանառությունը և երբ ակտիվացնել կոլեկտիվ ճնշումը (պրեսինգը): Այլ խոսքերով՝ խաղի ընթերցում, հավասարակշռություն և վերահսկողություն: Այն ամենը, ինչ «Ռեալ Մադրիդը» տարիներ շարունակ փնտրում է: