Ֆուտբոլիստը թիմակիցներին տեղեկացրել է Արբելոայի հետ վիճաբանության մասին և խոստովանել, որ հավանաբար այլևս չի հայտավորվի խաղերին:

«Ես խնդրել եմ մարզչին, որ մենք այլևս ոչ մի կապ չունենանք»: Սեբալյոսը դեռ մեկ շաբաթ առաջ «հրաժեշտ է տվել» «Մադրիդին»: Նա շարունակում է մարզվել, բայց այլևս թիմի լիարժեք անդամ չէ: Նա մարզվում է խմբի հետ, բայց հայտացուցակներից դուրս է մնում, և այդպես կլինի մինչև մրցաշրջանի ավարտը: «Սեբալյոսի գործը» բացվեց անցյալ ուրբաթ՝ «Բետիսի» դեմ խաղի հայտացուցակից դուրս մնալուց հետո, և այլևս հետդարձի ճանապարհ չկա. հաջորդ քայլը նրա հեռացումն է «Ռեալ Մադրիդից»։

Ամեն ինչ սկսվեց Արբելոայի հետ առանձնազրույցից հետո: Սեբալյոսը մտել է մարզչի սենյակ, դուրս եկել և հանդերձարանում թիմակիցներին ասել, որ խնդրել է մարզչին այլևս ոչ մի տեսակ հարաբերություն չունենալ: Ֆուտբոլիստը ակնարկել է, որ Արբելոայի հետ կա անձնական խնդիր և ինքը հասկանում է, որ այլևս չի խաղալու: Նա սա հայտնել է ընկերներին, որպեսզի իրավիճակը չազդի թիմի վրա:

Կոնֆլիկտ՝ առանց հետդարձի

Ակումբը որոշել է հարգել մարզչի որոշումը: Ավելին՝ «Մադրիդը» նույնիսկ չի փորձել թաքցնել իրականությունը և պաշտոնապես հայտնել է, որ խաղացողը դուրս է մնացել «տեխնիկական որոշման» պատճառով: Ակումբում կարծում են, որ ֆուտբոլիստը գիտակցաբար է գնացել կոնֆլիկտի, որպեսզի հիմնավորի իր հեռացումը և խաղաժամանակի պակասը: Սեբալյոսը ապրիլի սկզբից ի վեր ոչ մի րոպե չի խաղացել և այլևս չի խաղա: Փետրվարի 21-ին «Օսասունայի» դեմ նրա անցկացրած րոպեները կլինեն վերջինը «Ռեալ Մադրիդի» մարզաշապիկով:

Ակումբը պաշտպանում է Արբելոային

Սեբալյոսի վիճակը հասել էր անդառնալի կետի դեռ մարտի վերջին: 29 տարեկանում նա հասկանում էր, որ սա իր վերջին տարին է սպիտակների կազմում: Ակումբը նույնպես այդպես է կարծում. նրա հեռացումը թույլ կտա թեթևացնել աշխատավարձերի բեռը և տեղ բացել երիտասարդ տաղանդների համար: Ամենայն հավանականությամբ, նա կվերադառնա «Բետիս», թեև նրանով հետաքրքրված են նաև այլ ակումբներ: