«Ռեալը» ֆինանսական առումով լիովին պատրաստ է Մբապեի տրանսֆերին

12.11.2021

2922 0

ՊՍԺ-ի հարձակվող Կիլիան Մբապեի՝ «Ռեալում» հանդես գալու երազանքն օրեցօր ավելի իրատեսական է դառնում։ Նրա պայմանագրի ժամկետը ՊՍԺ-ի հետ հունիսի 30-ին է լրանում, և արդեն հունվարի 1-ից, նա կարող է բանակցել ցանկացած ակումբի հետ, սակայն նրա ուշադրությունը միայն Մադրիդի «Ռեալի» վրա է սևեռված։

Մբապեն արդեն 50 օր անց կարող է ազատվել փարիզյան ճիրաններից։ Այս տարվա ամռանը ՊՍԺ-ն բաց չթողեց ֆուտբոլիստին, չնայած 180 մլն եվրո կազմող առաջարկ էր ստացել՝ հասկանալով, որ այս առաջարկը մերժելով ռիսկի են դիմում նրան հաջորդ տարի անվճար բաց թողնել։

Եվ չնայած «Ռեալում» հիասթափված էին, որ 22-ամյա ֆուտբոլիստն այս ամառ չեկավ, «սերուցքայինների» հետաքրքրվածությունը չմարեց։ Վերջին շրջանում ֆուտբոլիստի շրջապատի հետ շփումը սերտանում է։ Մբապեն առաջվա պես «Ռեալի» թիվ 1 տրանսֆերային թիրախն է և մադրիդյան ակումբը կփորձի որքան հնարավոր շուտ լուծում տալ այս հարցին։

Ֆինանսական տեսանկյունից «Ռեալը» լիովին պատրաստ է Մբապեի տեղափոխությանը։ Նրա աշխատավարձը համապատասխան կլինի ակումբի նոր՝ գլխավոր աստղի կարգավիճակին։ Բացի այդ, ազատ գործակալի կարգավիճակով տեղափոխվելու դեպքում նա պայմանագիրը կնքելու հետո մեծ պարգևավճար կստանա։ «Ռեալը» շատ երկար է սպասել Մբապեին և արդեն լիովին պատրաստ է նրան դիմավորելուն։