Բրազիլացին, ով բաց կթողնի Աշխարհի առաջնությունը, առաջիկա օրերին կսկսի ապաքինման գործընթացը:

«Մեր խաղացող Էդեր Միլիտաոն այսօր հաջողությամբ վիրահատվել է ձախ ոտքի բիցեպսի մկանային ջլի պատռվածքի պատճառով: Վիրահատությունը կատարվել է բժիշկ Լասսե Լեմպայնենի կողմից՝ «Ռեալ Մադրիդի» բժշկական ծառայությունների հսկողության ներքո: Միլիտաոն առաջիկա օրերին կսկսի իր վերականգնողական աշխատանքները»,- նշված է ակումբի պաշտոնական հաղորդագրության մեջ:

Միլիտաոն որոշեց վիրահատվել երկար մտորումներից հետո՝ դիտարկելով նաև բուժման կոնսերվատիվ տարբերակը, որը զգալիորեն կկրճատեր բացակայության ժամանակը մինչև հինգ շաբաթ: Այդ տարբերակը թույլ կտար նրան մասնակցել Աշխարհի առաջնությանը Բրազիլիայի հավաքականի հետ, բայց կար վնասվածքի կրկնության մեծ ռիսկ: Վիրահատության արդյունքում այդ ռիսկը նվազում է, սակայն նա ստիպված կլինի բաց թողնել հինգից վեց ամիս:

«Փառք Աստծո, ամեն ինչ լավ է: Սրտանց շնորհակալ եմ բոլորին աջակցության հաղորդագրությունների համար»,- վիրահատությունից հետո սոցցանցերում կիսվել է Միլիտաոն իր կնոջ՝ Տաինա Կաստրո Միլիտաոյի հետ լուսանկարով: Այնուհետև պաշտպանը գրառում է կատարել՝ շնորհակալություն հայտնելով ընտանիքին.

«Նրանք, ովքեր ապրում են ինձ հետ, գիտեն, թե որքան եմ նվիրվել ու քրտնաջան աշխատել ֆիզիկական լավագույն վիճակում լինելու համար, բայց, ցավոք, ես պետք է խնամեմ մարմինս, որպեսզի կարողանամ վստահությամբ խաղալ «Ռեալ Մադրիդում» և հավաքականում: Բոլորին, ովքեր ինձ ջերմության և աջակցության խոսքեր են ուղարկել՝ իմ անկեղծ շնորհակալությունը: Նաև բոլորին, ովքեր իմ կողքին են՝ իմ ընտանիքին, երեխաներիս, կնոջս... իմացեք, որ պայքարը շարունակվում է, քանի որ լավագույնը դեռ առջևում է»: