«Ռեալ Մադրիդն» ամրապնդեց իր դիրքը որպես համաշխարհային ֆուտբոլի առաջատար՝ դառնալով առաջին ակումբը, որի գործառնական եկամուտը գերազանցեց 1 միլիարդ եվրոն։ Այս մասին նշված է Football Benchmark-ի 2025 թվականի «Եվրոպական չեմպիոններ» հաշվետվությունում, որը գնահատում է վեց առաջատար եվրոպական լիգաների չեմպիոնների («Ինտեր», «Մանչեսթեր Սիթի», «ՊՍԺ», «ՊՍՎ», «Ռեալ Մադրիդ» և «Սպորտինգ») բիզնես ցուցանիշները։ Ակումբը 2023/24 մրցաշրջանում սահմանել է ֆինանսական կայունության նոր չափանիշ։

Ռեկորդային եկամուտ

Ֆլորենտինո Պերեսի ղեկավարությամբ «Ռեալ Մադրիդի» ընդհանուր եկամուտը կազմել է 1․065 միլիարդ եվրո՝ զգալիորեն գերազանցելով իր մոտակա մրցակիցներին՝ «Մանչեսթեր Սիթիին» (838 միլիոն եվրո) և ՊՍԺ–ին (806 միլիոն եվրո)։ Սա ֆինանսական հաջողությունն արդյունք է մի շարք ռազմավարական նախաձեռնությունների և գործառնական բարելավումների, որոնց հիմքում ընկած է նորացված «Սանտիագո Բեռնաբեու» մարզադաշտը։

«Բեռնաբեուի» ազդեցությունը

«Սանտիագո Բեռնաբեուի» վերակառուցումը դարձավ «Արքայական ակումբի» ֆինանսական վերելքի առանցքային գործոն։ Մարզադաշտի արդիականացումը բերեց խաղերից ռեկորդային՝ 251 միլիոն եվրոյի եկամուտ, ինչը 28%-ով ավելին է տարեկան գործառնական եկամտից։ Մինչդեռ միայն VIP գոտիների բարելավումը ակումբին ապահովեց ևս 83 միլիոն եվրոյի եկամուտ՝ ցույց տալով ակումբի ունակությունը՝ օգտագործելու պրեմիում հնարավորությունները ֆինանսական շահ ստանալու նպատակով։

Բազմազան եկամտի աղբյուրներ

«Ռեալի» ֆինանսական հաջողությունն արտացոլվում է ոչ միայն խաղերից ստացված եկամուտներով։ Ակումբի հիմնական եկամուտի աղբյուրներն են․

Կոմերցիոն եկամուտ․ 26%-ով աճ՝ շնորհիվ նորարարական մերչենդայզինգի ռազմավարությունների և շահավետ գովազդային պայմանագրերի։

Հեռարձակման իրավունքներ․ 8%-ով աճ, ինչին նպաստել է Չեմպիոնների լիգայում տարած հաղթանակը։

Թիմի արժեքն ու կառավարման մոդելը

«Ռեալ Մադրիդի» թիմի ընդհանուր արժեքը գնահատվում է 1․364 միլիարդ եվրո։ Ակումբը նաև աշխարհում առաջատար է կազմակերպության արժեքով, որը կազմում է 5․097 միլիարդ եվրո։

Երիտասարդների զարգացում

2025 թվականի «Եվրոպական չեմպիոններ» հաշվետվությունում նշվում է «Ռեալ Մադրիդի» հավատարմությունը երիտասարդական համակարգի զարգացմանը։ Ակումբը հաջողության է հասել ակադեմիայի ֆուտբոլիստների առաջին թիմ տեղափոխման, ակադեմիայի ֆուտբոլիստների վաճառքից ստացված եկամտի և մինչև 21 տարեկան ֆուտբոլիստների մասնակցության ցուցանիշներով։ 2019-2025 թվականների ընթացքում «Ռեալ Մադրիդը» ակնկալում է ստանալ 218 միլիոն եվրո՝ երիտասարդ ֆուտբոլիստների տրանսֆերի վաճառքից։

Արդյունավետ ծախսերի կառավարում

Չնայած անձնակազմի վրա ծախսերի աճին՝ մինչև 505 միլիոն եվրո (որից 41 միլիոն եվրոն՝ թիմի մարզական հաջողությունների բոնուսների համար), «Ռեալ Մադրիդը» պահպանում է ծախսերի տպավորիչ արդյունավետությունը․ աշխատակիցների ծախսերը գործառնական եկամտի նկատմամբ կազմել են 47%։ Այս ցուցանիշը կտրուկ հակադրվում է ՊՍԺ-ի (83%) և «Սպորտինգի» (89%) ցուցանիշներին, որոնք գերազանցել են առաջարկվող 70% շեմը։