«Սերուցքայինները» վերջին երկու մրցաշրջանների 115 խաղերում կրել են 26 պարտություն: Պարտությունների տոկոսը կտրուկ աճել է 23-24 մրցաշրջանից հետո, երբ թիմը 55 խաղից պարտվել էր միայն երկուսում՝ ընդհանուրի հազիվ 3%-ը:

Ապրիլը՝ այն ամիսը, երբ «Մադրիդը» սովորաբար կառուցում է իր փառահեղ հաղթանակները, այս անգամ վերածվել է իսկական տառապանքի: Երկու անընդմեջ պարտությունները («Մալյորկայից»՝ լիգայում և «Բավարիայից»՝ Չեմպիոնների լիգայում) սև ամպեր են կուտակել թիմի ապագայի վրա, որը կանգնած է անդունդի եզրին այն երկու մրցաշարերում, որոնցով սովորաբար չափվում է նրանց հաջողությունը:

Ամենավատն այն է, որ սա ոչ թե պատահականություն է, այլ միտում (թրենդ): Վերջին երկու մրցաշրջաններում թիմն արդեն 26 պարտություն ունի 115 խաղում: 22,6% կորցրած խաղերի այս ցուցանիշը պատկերում է թիմի իրական վիճակը, որը վտանգավոր կերպով մոտենում է «դատարկ ձեռքերով» մնալու սահմանագծին՝ Իսպանիայի սուպերգավաթում և գավաթում կրած անհաջողություններից հետո:

Թվում է՝ խնդիրը մարզչի մեջ չէ, քանի որ այս ժամանակահատվածում թիմը երեք մարզիչ է փոխել: 24-25 մրցաշրջանում դեռ Կառլո Անչելոտին էր ղեկին: Նա եկել էր երկու դուբլերով (Լիգա-ՉԼ 2022 և 2024), բայց հենց այդտեղ էլ ավարտվեցին «գինու և վարդերի» օրերը՝ չնայած Կիլիան Մբապեի գալուստին: Իր առաջին մրցաշրջանում «Արսենալը» խորտակեց եվրոպական երազանքը, իսկ թիմը կարողացավ նվաճել միայն երկու ամենաքիչ կարևոր տիտղոսները՝ Եվրոպայի սուպերգավաթն ու Ակումբային աշխարհի առաջնությունը:

Առանց լուծման

Խաբի Ալոնսոյի գալուստը նույնպես չօգնեց ուղղել թիմի ընթացքը, թեև նա լավ սկսեց մինչև դեկտեմբեր: Նա հեռացավ հունվարին, չնայած իր գլխավորությամբ թիմը պարտվել էր ընդամենը հինգ խաղում:

Արբելոան ոչ միայն չկարողացավ կանգնեցնել այս «արյունահոսությունը», այլև տեսավ, թե ինչպես է այն աճում: Նրա գլխավորությամբ 19 խաղում գրանցվել է վեց պարտություն՝ սարսափելի 31,5%, ինչը տագնապի ազդանշան է դարձել Վալդեբեբասում: Թեև թիմը դեռ կյանքի նշույլներ ունի Մյունխենի պատասխան խաղից առաջ, իրավիճակը օրհասական է ինչպես Չեմպիոնների լիգայում, այնպես էլ լիգայում, որտեղ առաջատարից հետ են յոթ միավորով:

Մեկուկես մրցաշրջանից մի փոքր ավելի ժամանակահատվածում «Մադրիդը» ձեռքից բաց թողեց այն ամրությունը, որն ուներ մինչև 2024-ի ամառը: Երեք մարզիչներն էլ անկարող եղան թիմին հուսալի կառուցվածք տալ, և հիմա ամբողջ մրցաշրջանի ճակատագիրը կախված է հաջորդ չորեքշաբթի «Բավարիայի» դեմ կայանալիք խաղից, որտեղ հաղթանակը թվում է նույնքան անհավանական, որքան հերոսական: