Նրա ապագան գնում է դեպի պայմանագրի երկարաձգում, սակայն այն կունենա հստակ կետեր հեռանալու համար: Դրանցից մի քանիսը կարող են ակտիվանալ նույնիսկ այս ամառ: «Դորտմունդը» ցանկանում է խուսափել նրան անվճար կորցնելուց:

Պայմանագրի երկարաձգում... բայց «մանր տառերով»: Շլոտերբեկի գործը սկսում է նմանվել իսկական սերիալի: «Ժամանակակից Կայզերը», ինչպես նրան անվանում են, պատրաստվում է դուռը կիսաբաց թողնել: Նրա նոր պայմանագիրը կունենա շատ հստակ հրաժարագնի կետեր` հեռանալու համար: «Դորտմունդի» առաջնահերթությունը նրան անվճար չկորցնելն է (պայմանագիրն ավարտվում է 2027-ին), բայց ակումբը քաջատեղյակ է իրավիճակին: «Մադրիդը», որն արդեն սկսել էր նրան կորսված համարել, հիմա «լրացուցիչ կյանքի» հնարավորություն է տեսնում:

Հենց Շլոտերբեկն է սեղմել այս պատմության «կարմիր կոճակը»: «Ես պետք է կտրուկ հերքեմ, որ իմ պայմանագրի երկարաձգումն անխուսափելի է. ցավոք, մենք դեռ չենք հասել այդ կետին»,- ասել է նա Գանայի դեմ խաղից հետո: Նա նշել է նաև, որ իրավիճակը բարդացել է ակումբի սպորտային տնօրենի փոփոխության պատճառով:

Նոր պայմաններ

Դորտմունդից ստացվող լուրերը հուշում են, որ նա, ի վերջո, կվերահաստատի հավատարմությունը, բայց պայմանները փոխվել են: Աշխատավարձի կտրուկ բարձրացումը (14 մլն եվրո) և մինչև 2031 թվականը նախատեսված պայմանագիրը դեռ հարցականի տակ են: Սակայն ամենակարևորը ելքի ուղիներն են, որոնք գրավոր կհաստատվեն: «Մադրիդը» գիտի, որ եթե ցանկանա գործել այս ամառ, հնարավորություն կունենա:

Կենտրոնական պաշտպանի որոնումները

Ռյուդիգերի հիանալի մարզավիճակն ու ծնկի խնդիրների լիակատար անհետացումը թեթևացրել են իրավիճակը: Եկող մրցաշրջանի համար արդեն կան չորս կենտրոնական պաշտպաններ՝ Միլիտաո, Հաուսեն, Ասենսիո և Ռյուդիգեր: Սակայն «Բեռնաբեուում» նախընտրում են ունենալ հինգը:

Ալաբան հաստատ կհեռանա այս ամառ, ուստի փնտրվում է նրա փոխարինողը: Կոնատեի անունը դեռ սեղանին է, բայց Շլոտերբեկը նույնպես մնում է ուշադրության կենտրոնում՝ իր նոր պայմանագրի «մանր տառերի» շնորհիվ: