«Մադրիդի» հարձակվողը, ով մեկնեց Ֆրանսիա՝ հնարավորություններ ստանալու և Աշխարհի 2026թ. առաջնության ուղեգիր նվաճելու համար, հավաքականների դադարից վերադառնում է ավելի ուժեղացած:

«Նորեկները մեծ ներդրում ունեցան, օգտագործեցին իրենց հնարավորությունը, և ակնհայտ է, որ վերջնական հայտացուցակի վերաբերյալ կասկածներն ավելանում են»: Օռլանդոյում «Կրոատիայի» դեմ հաղթանակից հետո Կառլո Անչելոտիի այս միտքը պատահական չէր: Տողատակերում կար մեկ անուն՝ Էնդրիկ:

Բրազիլացի հարձակվողը մեկ տարի ստվերում մնալուց հետո վերադարձավ հավաքական և նրանից պահանջվեց 15 րոպեից պակաս ժամանակ՝ իր հետքը թողնելու համար: Դա կարճ, բայց հզոր ներխուժում էր: Հենց այն, ինչ նրան պետք էր՝ Աշխարհի առաջնությունից դուրս մնալու իր մեծ վախը փարատելու համար:

Երկրորդ հնարավորություն

«Մադրիդում» գրեթե մոռացության մատնված Էնդրիկը որոշեց վարձավճարով տեղափոխվել «Լիոն»՝ հրաշքի հետևից: Ֆրանսիայում նա գտավ այն, ինչ կորցրել էր՝ խաղային ժամանակ, վստահություն և գոլեր: Դրանով նա ստացավ երկրորդ հնարավորությունը Բրազիլիայի հավաքականում և բաց չթողեց այն: Նա դաշտ մտավ 76-րդ րոպեին, երբ խաղը «խցանված» էր (1-0), և փոխեց սցենարը. վաստակեց 11-մետրանոց (2-1) և ընդամենը երկու րոպե անց գոլային փոխանցում կատարեց Մարտինելիին՝ վերջակետ դնելով խաղին:

Բրազիլիայում համեմատությունները չուշացան. «Նա արեց այն, ինչ սպասվում էր Նեյմարից: Էնդրիկը 15 րոպեով դարձավ Նեյմար, այն նախկին Նեյմարը»: Հաղորդագրությունը պարզ է՝ Էնդրիկը նորից վճռորոշ դարձավ ամենաճիշտ պահին: Խաղից հետո նա նշեց. «Երբ մտնում եմ դաշտ, աղոթում եմ: Շատերը Բրազիլիայում ինձ չեն սիրում, բայց ես շնորհակալ եմ Աստծուն ամեն պահի համար: Մենք կշարունակենք աշխատել, որովհետև աշխատանքից լավ ոչինչ չի պատասխանում հարցերին»:

Էնդրիկը նոր հաղթաթուղթ է խաղարկում

Անչելոտին ընտրության մեծ հնարավորություն ունի՝ Ռաֆինյա, Վինիսիուս, Մարտինելի, Սավինյո, նույնիսկ Նեյմարը կարող է վերադառնալ, եթե վերջին ամիսներին լավ մարզավիճակ ձեռք բերի: Բայց Էնդրիկն ունի այլ հաղթաթուղթ. նրա խաղաոճն ավելի ուղղահայաց է, ավելի ագրեսիվ և ուղիղ: Կարճատև մրցաշարերում, ինչպիսին Աշխարհի առաջնությունն է, այդ տարբերությունը կարող է վճռորոշ լինել: Ինչպես Բրազիլիայում են ասում. «Էնդրիկի 15 րոպեները կարող են փոխել հավաքականի պատմությունը գավաթի խաղարկությունում»: Եվ առաջին անգամ երկար ժամանակ անց, Էնդրիկն այլևս չի խաղում վախով: