«Մադրիդը» հաղթել է իր վերջին վեց խաղերից միայն մեկում, իսկ մարզիչը գրանցել է հաղթանակների վատթարագույն ցուցանիշը 2008-ի Շուստերից հետո:

Բելյերինի գոլը 94-րդ րոպեին վերջ դրեց ոչ միայն խաղին, այլև Լա լիգայի մասին ցանկացած խոսակցության: «Մադրիդը» «Լա Կարտուխայից» հեռացավ մեկ միավորով և այն զգացողությամբ, որ մրցաշրջանը դուրս է եկել վերահսկողությունից: Ընդամենը երկու ամսում թիմը սեփական ուժերին վստահելուց անցավ մի վիճակի, որտեղ տեսնում է՝ ինչպես է «Բարսան» հեռանում՝ ունենալով ինը անընդմեջ հաղթանակ:

Թեև սկզբում ամեն ինչ այդքան սև չէր: Երբ Արբելոան եկավ, թիմը նոր շունչ ստացավ, Վինիսիուսը նորից դարձավ վճռորոշ, և «սերուցքայինները» նույնիսկ բարձրացան առաջին հորիզոնական 24-րդ տուրում: Բայց դա տևեց ընդամենը մեկ շաբաթ: Պարտությունը «Օսասունայից», հետո Մուրիքիի գոլը Մալյորկայում և Բելյերինի հարվածը երեկ... այս վերջին րոպեներին բաց թողած գոլերը «Մադրիդի» վրա նստեցին հինգ միավոր:

Արքայական գավաթը ձեռքից գնաց «Ալբասետեի» դեմ խաղում, երբ Արբելոան նոր էր սկսում աշխատանքը: Լա լիգան գնալով ավելի անհասանելի էր դառնում: Չեմպիոնների լիգան մնացել էր որպես վերջին հույս, որտեղ թիմը «Սիթիի» դեմ ցույց տվեց իր իրական ԴՆԹ-ն, բայց «Բավարիան» ամեն ինչ փչացրեց: Մյունխենի պարտությունը, Կամավինգայի հեռացումը և մրցավարական սկանդալները վերջնականապես կոտրեցին թիմին:

Վերջնական անկումը

Այն, ինչ տեղի ունեցավ հետո, անտարբերություն է, որը չի համապատասխանում այսպիսի կազմ ունեցող թիմին: Վերջին վեց խաղում՝ ընդամենը մեկ հաղթանակ: Չուամենիի, Միլիտաոյի ու Կուրտուայի բացակայությունները ազդեցին, բայց դա չի արդարացնում թվերը: Արբելոան ունի հաղթանակների ընդամենը 60,9% ցուցանիշ իր 23 խաղերում: Սա վատթարագույնն է 2008 թվականից ի վեր, երբ Բերնդ Շուստերը հեռացվեց 59% ցուցանիշով:

«Արբելոայի էֆեկտը» իրական էր մի քանի շաբաթ: Նա կարողացավ միավորել ներսից պառակտված թիմին և ստիպել խաղացողներին հավատալ սեփական ուժերին: Սակայն ավարտը կարող է շատ ավելի դաժան լինել: «Բարսան» կարող է չեմպիոնությունը տոնել հենց «Մադրիդի» դեմ խաղում, կամ ստիպել նրանց «չեմպիոնական միջանցք» անել «Կամպ Նոուում»: Երկու պատկեր, որոնք երկու ամիս առաջ ոչ ոք չէր էլ կարող պատկերացնել: