Չեմպիոնների լիգայի հիմնական փուլի 7–րդ տուրում Մադրիդի «Ռեալը» սեփական հարկի տակ 5–1 հաշվով առավելության հասավ «Զալցբուրգի» նկատմամբ։

Վինիսիուս Ժունիոր

«Մբապեն տեղափոխվել է «Ռեալ Մադրիդ», որպեսզի մեզ օգնի։ Իսկ մենք, մեր հերթին, կօգնենք նրան դառնալ լավագույն ռմբարկու բոլոր մրցաշարերում։

Շնորհակալ եմ, որ «Զալցբուրգի» դեմ խաղում ինձ ճանաչեցին լավագույն ֆուտբոլիստ, բայց կարծում եմ, այս մրցանակին արժանի էին նաև մյուսները՝ Ռոդրիգոն, Բելինգեմը... Ես ուրախ եմ հաղթանակի և խփած գոլերի համար, թեև վատ խաղացի (ծիծաղում է)։

Շատ ուրախ եմ, որ «Ռեալի» կազմում խփել եմ 101 գոլ։ Ինձ ընդամենը երեք գոլ է բաժանում Ռոնալդոի ցուցանիշից՝ «սերուցքայինների» մարզաշապիկով։ Հուսով եմ՝ կկարողանամ իմ հետքը թողնել «Ռեալում», քանի որ դա իմ երազանքն է։ Իմ ապագան «Ռեալ Մադրիդում» է։

Անչելոտին «Ռեալը» ղեկավարում է արդեն շատ տարիներ, և նա հրաշալի հասկանում է, թե ինչպես կառավարել թիմը։ Այս ակումբում ամեն ինչ շատ պարզ է, քանի որ բոլորս լսում ենք միմյանց։ «Ռեալն» ունի բազմաթիվ երիտասարդներ, որոնք ցանկանում են իրենց ներդրումը բերել։

Իմ գոլերի տոնու՞մը։ Ես հաճախ եմ խաղում PlayStation ընկերներիս հետ, և նրանք ինձ խնդրեցին, որ այդպես տոնեմ իմ գոլերը։ Ես դա կրկնօրինակում եմ ընկերոջիցս, ով Ֆրանսիայից է»։

Ռոդրիգո

«Բելինգեմի գոլային փոխանցումնե՞րը իմ գոլերի դրվագներում։ Ջուդի կողքին խաղալը շատ հեշտ է։ Պարզապես նայեք նրա շարժումներին դաշտում, փոխանցումներին... Ես ուրախ եմ, որ կարող եմ խաղալ նրա հետ։

Ես միշտ պաշտպանելու եմ Անչելոտիին։ Մենք ծանր աշխատանք ենք կատարում, որպեսզի խուսափենք վատ պահերից, բայց երբեմն դա դժվար է։ Այս մրցաշրջանում մենք պարտվել ենք այնպիսի խաղերում, որտեղ պարտվելու իրավունք չունեինք։ «Զալցբուրգի» դեմ հանդիպման արդյունքը մեզ ավելի մեծ վստահություն կտա։

Խաղի լավագույն ֆուտբոլիստ ճանաչվել է Վինիսիու՞սը։ «Ռեալում» մենք խաղում ենք թիմի համար, ուստի էական չէ, թե ով է ստացել այդ մրցանակը։ Ես ուրախ եմ Վինիի համար, այսօր նա ևս երկու գոլ խփեց։ Հաղթանակը ամենակարևորն է։

Հասարակությունը փորձում է կոնֆլիկտ ստեղծել Բելինգեմի, Վինիսիուսի, Մբապեի և իմ միջև, բայց մեր հարաբերությունները շատ լավն են։ Մենք միշտ միասին ենք, ոչ միայն հանդերձարանում, այլև ընթրիքների ժամանակ և այլն։

Վինիսիուսը ներողությու՞ն խնդրեց մեզանից՝ «Վալենսիայի» դեմ խաղում ստացած կարմիր քարտի համար։ Այո, ամեն ինչ լավ է։ Մենք ընտանիք ենք, ուստի միշտ աջակցում ենք նրան։

Գոլերի տոնու՞մը։ Ինձ ասացին, որ պետք է յուրովի նշեմ իմ գոլերը, և ես որոշեցի տոնել այնպես, ինչպես իմ մանկության կուռք Ջոն Սինան։ Ինձ շատ էր դուր գալիս այդ մարզիկը»։

 Ռ. Ասենսիո

«Իմ նպատակը լավագույն ակումբում անցկացրած յուրաքանչյուր պահից հաճույք ստանալն է և այդ ամենից օգտվելը, որպեսզի ամեն օր ինչ-որ նոր բան սովորեմ։

Խաղը աջ պաշտպանիդիրքու՞մ։ Պատրաստ եմ անել այն, ինչ կխնդրի մարզիչը։ Կփորձեմ անել առավելագույնը ցանկացած դիրքում և յուրաքանչյուր րոպե, երբ գտնվում եմ «Ռեալում»։

Ես շատ ուրախ եմ Խակոբոյի համար, որը գլխավոր թիմում իր նորամուտը նշեց։ Հուսով եմ, որ շատ այլ «կաստիլյացիներ», որոնք պայքարում են այս երազանքի համար, նույնպես կկարողանան այն իրականություն դարձնել։

Համեմատությունները Ռամոսի հե՞տ։ Դա շատ հաճելի է։ Սերխիոն լավագույններից է ֆուտբոլի պատմության մեջ։ Բայց իմ անունը Ռաուլ Ասենսիո է, և ես կփորձեմ կառուցել իմ կարիերան հնարավորինս լավագույն ձևով»։

Խակոբո

«Ես շատ երջանիկ եմ։ Այս հանդիպումն ինձ համար որպես երազանք էր։ Չեմ կարող բառերով նկարագրել այն, ինչ հիմա զգում եմ»։