Մադրիդի «Ռեալը» նոր գլուխ ավելացրեց ֆուտբոլի պատմության գրքերում՝ նախ՝ 2022 թվականին նվաճելով Չեմպիոնների լիգայում իր 14-րդ, ապա՝ 2024 թվականին 15-րդ տիտղոսը: Փարիզում «Լիվերպուլի» դեմ խաղում տարած հաղթանակով մեր թիմն ավելացրեց իր գերիշխանությունը մրցաշարում, իսկ 2024 թվականին ընդլայնեց այն՝ Դորտմունդի «Բորուսիայի» դեմ «Ուեմբլիում» կայացած եզրափակիչում տարած հաղթանակի շնորհիվ: Տասնամյակի սկզբում ապահովվեց նաև 35-րդ տիտղոսը Լա լիգայում, իսկ հետո՝ 36-րդը, 5-րդ և 6-րդ տիտղոսները Եվրոպայի Սուպերգավաթի խաղարկությունում, 8-րդը՝ ԱԱԱ-ում, 1-ինը՝ վերաբրենդավորված Միջմայրցամաքային գավաթի խաղարկությունում, 20-րդը՝ Արքայական գավաթի խաղարկությունում և 13-րդ տիտղոսն Իսպանիայի Սուպերգավաթում:

Կառլո Անչելոտիի գլխավորությամբ Մադրիդի «Ռեալը» նվաճեց Չեմպիոնների լիգայում իր 14-րդ գավաթը: Իտալացի մարզչի վերադարձից հետո թիմը 2022 թվականին գլխավերևում պահեց մայրցամաքային գավաթը՝ Փարիզում կայացած եզրափակիչում հաղթելով «Լիվերպուլին»: Գավաթային հաջողությունն ավարտեց 2021/22 մրցաշրջանի տպավորիչ արշավը, որի ընթացքում թիմը 12-րդ տիտղոսը նվաճեց Իսպանիայի Սուպերգավաթի խաղարկությունում: Դա տեղի ունեցավ 2022 թվականի հունվարին՝ Սաուդյան Արաբիայում անցկացված մրցաշարում: Նախ՝ կիսաեզրաակիչում «Սպիտակները» լրացուցիչ ժամանակի արդյունքում 3-2 հաշվով հաղթեցին «Բարսելոնային», իսկ եզրափակիչում Մոդրիչի ու Բենզեմայի գոլերի շնորհիվ 2-0 հաշվով հաղթեցին «Աթլետիկոյին» ու նվաճեցին գավաթը: Իսկ հետո եկավ 35-րդ տիտղոսն Իսպանիայի առաջնությունում: Մրցաշրջանի ավարտից 4 տուր առաջ «Ռեալն» ապահովեց տիտղոսը տնային խաղում «Էսպանյոլին» 4-0 հաշվով հաղթելուց հետո: 

Հաջողությունները շարունակվեցին 2022/23 մրցաշրջանի սկզբում, երբ Եվրոպայի Սուպերգավաթի համար խաղում «Ռեալը» 2-0 հաշվով հաղթեց Ֆրանկֆուրտի «Այնտրախտին»: 2023 թվականի փետրվարին մեր թիմն 8-րդ տիտղոսը նվաճեց աշխարհի ակումբային առաջնությունում՝ եզրափակիչում 5-3 հաշվով հաղթելով «Ալ Հիլյալին»: Այնուհետև՝ մայիսին, Անչելոտիի գլխավորած տղաները, Ռոդրիգոյի դուբլի շնորհիվ Արքայական գավաթի եզրափակիչում գերազանցելով «Օսասունային», նվաճեցին մրցաշրջանի երրորդ տիտղոսը:

2023/24 մրցաշրջանը նույնպես, ավանդույթի համաձայն, տիտղոսային էր «Ռեալի» համար: «Արքայական ակումբը» 15-րդ անգամ նվաճեց ականջավոր գավաթը, 36-րդ անգամ հռչակվեց Իսպանիայի չեմպիոն, հաղթեց նաև Իսպանիայի Սուպերգավաթը:

2024/25 մրցաշրջանը «Ռեալը» սկսեց տիտղոսով՝ 6-րդ անգամ բարձրացնելով ՈՒԵՖԱ-ի Սուպերգավաթը: 

2025 թվականին «Արքայական ակումբը» դարձավ վերաբրենդավորված Միջմայրցամաքային գավաթի խաղարկության առաջին հաղթողը: 

2025/26 մրցաշրջանում Մադրիդի «Ռեալը» մնաց առանց տիտղոսի: Թիմն Իսպանիայի սուպերգավաթային եզրափակիչում 2-3 հաշվով պարտվեց «Բարսելոնային», Իսպանիայի առաջնությունում զբաղեցրեց երկրորդ տեղը, Արքայական գավաթի խաղարկությունում պայքարն ավարտեց 1/8 եզրափակիչում, իսկ Չեմպիոնների լիգայի քառորդ եզրափակիչում ճանապարհը զիջեց Մյունխենի «Բավարիային»:

Պատմությունը շարունակում է գրվել...