Հաշված ժամեր են մնում 2011թ. ավարտին: Ամանորի կապակցությամբ իրենց շնորհավորանքի խոսքն են մեր կայքի ընթերցողներին ուղղել բոլոր այն մարդիկ, ովքեր իրենց սերը, նվիրվածությունն ու ջանքերն են ներդնում կայքի ամենօրյա աշխատանքի համար: Այսօր հնարավորություն ունեք ծանոթանալու նրանց, ովքեր իրականություն են դարձնում ամենամասսայական հայկական կայքը՝ նվիրված մեկ ակումբի և կարդալու նրանց բարեմաղթանքները: Չենք կասկածում, որ նոր տարում Ձեր սիրելի կայքը նորանոր նվաճումներ է արձանագրելու և մեր սիրելի ակումբի հաջողությունների մասին բազմաթիվ նյութերի հետ միասին կավելանան ինչպես կայքի զարգացմանը նպաստողների թիմը, այնպես էլ իր մասշտաբները կմեծացնի մեր ֆան-ակումբը: «Միասին կարո՛ղ ենք»:
Armin R.M.
Արմինե Նազարյան, (նորություններ բաժին)
Արմինեն ոչ միայն Realmadrid.am-ի զարգացման գործում իր նպաստն ունեցող միակ ծաղիկն է, այլև իսպաներեն լեզվի գլխավոր ու միակ մասնագետն է: Հենց նրա շնորհիվ ենք հնարավորություն ունենում կարդալ ամբողջական և սոլիդ հոդվածներ` հենց բնօրինակից թարգմանված:
«Շնորհավո՛ր բոլորիս Նոր Տարին: Բնականաբար, ցանկանում եմ, որ հաղթանակների տարի լինի մեր սիրելի ակումբի հետ միասին: Թող ոչ մի հուսախաբություն չապրենք, ավելի հպարտանանք «արքայական» թիմի արքայական խաղով: ¡¡Feliz Navidad a todos!!»:
Fenómeno
Գևորգ Մովսիսյան, (նորություններ բաժին)
Երևանում չբնակվող մեր ամենանվիրված անդամներից է: Հենց նրա օգնությամբ ենք Մադրիդում կատարվող գլխավոր իրադարձությունների մասին իմանում «չերեզ» Աշտարակ:
«Այսօր անցյալի գիրկն ենք ուղարկում երկու հազար տասնմեկ թվականը՝ ունենալով թեˊ լավ, թեˊ վատ հիշողություններ: Այդ հիշողությունները ոմանց համար համակցում են «Ռեալ Մադրիդ» ֆուտբոլային ակումբին, ոմանց համար՝ ոչ: Սակայն կարևորն այստեղ ամենևին էլ ֆուտբոլ անունը կրող սպորտաձևը չէ, այլ կա մեկ այլ, հրապուրիչ, գրավիչ, դյութիչ, ճիշտ, անաղարտ զգացում, որը պետք է պատի մեզ՝ հայերիս: Մենք մի ժողովուրդ ենք, որը սովոր է ատամներով պահել իր ձեռք բերած ամեն մի բան. դա կլինի արժեք, նվաճում, հաղթանակ թե մեկ այլ բան, բայց մեր ազգը հատուկենտ է դրանով: Մենք սովորական չենք և պարտավոր ենք պահել այդ հատկությունն ամեն պարագայում: Կլինես «Ռեալ Մադրիդի», «Բարսելոնայի», «Միլանի», «Մանչեսթեր Յունայթեդի» թե մեկ այլ ակումբի երկրպագու՝ հոգով հայ ես. մենք չպետք է մոռանանք այս հատկությունը: Մարդկային տեսանկյունից ցանկություններս շատ մեծ են, և ես ի սրտե ցանկանում եմ, որ այդ ցանկությունները համակեն բոլորին, քանի որ դրա մեջ միայն ու միայն բարին ու լավն է: Ցանկանում եմ՝ Նոր տարում ունենաք զգալի ձեռքբերումներ բոլոր ասպարեզներում, հասնեք ձեր նպատակներին՝ միշտ ձեզ հետ պահելով մարդկայինը, համեստը, ճիշտը: Մեր թիմին ցանկանում եմ հաղթանակների բույլ գալիք տարում. մենք պետք է սպորտում դնենք մշտնջենական առաջատարի մույթը՝ ապացուցելու, որ մենք ենք միշտ առաջատարը ու մենք ենք մնալու: Նոր ձեռքբերումներ եմ մաղթում «արքայական» թիմին: Շնորհավորում եմ բոլորիս Ամանորը՝ սրտիս լիությամբ մաղթելով «սերուցքային» մաքրություն, ճշմարիտ հաջողություն ու կատարյալ սեր՝ դրանց միացնելով նաև բոլորիդ արդար ու բարի ցանկությունները՝ ասում եմ՝ շնորհավոր Ամանոր և Սուրբ Ծնունդ: Առոˊղջ եղեք»:
Գոքոր 08
Գոքոր Ավետիսյան, (ֆոտո բաժին)
Էջմիածնում բնակվող Գոքորը մեր կայքի՝ էներգիայով ամենից հարուստ և էմոցիոնալ անդամներից է: Նրա՝ կայքի աշխատանքներին միանալը զգալիորեն աշխուժացրեց կայքի ամենօրյա կյանքը: Հենց նրա շնորհիվ են ակնթարթային արագությամբ կայքում հայտնվում «Ռեալի» հանդիպումների ամենաթարմ լուսանկարները:
«Սիրելիˊ այցելուներ, հաˊյ մադրիդիստներ. այս տարին եղավ ձեռքբերումների և հաջողությունների տարի: Կայքը զգալիորեն առաջ է սլանում՝ իրենից ետ թողնելով մի քանի տասնյակ այլ կայքերի: Չգիտեմ, թե դրանցից որքանով եք գոհ, բայց արդյունքը գոհացրել է շատերին: Հաճելի է ունենալ հավատարիմ այցելուներ: Այսօր, երբ մենք մի քանի ժամ հետո կթևակոխենք 2012 թվական՝ հին տարում թողնելով բոլոր հաճելի և տհաճ պահերը, ցանկանում եմ շնորհավորել բոլորիդ Ամանորը և Սուրբ Ծնունդը: Ցանկանում եմ, որ եկող տարին լինի հաղթանակների տարի՝ համեմված գեղեցիկ և էմոցիոնալ դրվագներով»:
Գևոր
Գևոր Լոռեցյան, (նորություններ բաժին)
Այն ժամանակ, երբ ոչ ոք ժամանակ ու տրամադրություն չուներ կայքով զբաղվելու համար, նորությունների պակաս կար, հայտնվեց գյումրեցի Գևորգը, ով իր ուսերի վրա էր տանում կայքի գրեթե ողջ աշխատանքը: Նա կայքի անձնակազմից միակն է, ով անցնող տարվա ընթացքում իր համար հայտնաբերել է Ամերիկան: Այսօր էլ, չնայած բազմաթիվ նախագծերի ու պարապմունքների խիտ գրաֆիկին, Գևորգը ժամանակ գտնում է նյութեր հեղինակելու և մեր ֆեյսբուքյան էջը բազմաթիվ նորամուծություններով զարգացնելու և Երևանում կայացող հանդիպումների մասնակցելու համար:
«Նորից Նոր տարին է թակում մեր դռները, նորից բոլորը համախմբվելու են տոնական սեղանների շուրջ ու բաժակ բարձրացնեն՝ շնորհավորելով միմյանց Ամանորը: Արդեն երկրորդ տարին է, ինչ Ամանորը դիմավորում եմ նաև հայոց մադրիդիզմի գեղեցկագույն ոստանում՝ Realmadrid.am-ում, նույնպես: Այդ ընթացքում շատ բան է փոխվել, շատ բան եմ սովորել, նորանոր բաների հասել, բայց ինչ արել եմ, արել եմ ձեզ համար, սիրելի՛ այցելուներ:
Հիմա եկել է պահը, որ ճանապարհենք 2011-ին ու դիմավորենք 2012-ին, որը հորոսկոպով համարվում է վիշապի տարի: Որոշ խելացնորներ հայտարարել են, որ հենց գալիք տարում աշխարհը կկործանվի: Բայց ինձնից խորհուրդ, ավելի լավ է խարխուլ մակույկով հանձնվես ծովին, քան թե հավատաս նման խոսքերի: Միգուցե այդ աշխարհի վերջ ասվածը բառսամանների համար է, չէ՞ որ 2012-ը լինելու է «սերուցքային» տարի: Այնպես որ, ավարտելով խոսքս, ցանկանում եմ շնորհավորել բոլոր մադրիդիստներին ու նրանց հարազատներին գալիք Ամանորի կապակցությամբ՝ մաղթելով նորանոր հաղթանակներ ու բարձունքներ՝ նվաճված ազնիվ ու արդար աշխատանքով: Թող որ 2012-ը լինի մեծ հաջողությունների տարի թե՛ ձեր, թե՛ Realmadrid.am-ի ու նրա թիմի անդամների համար»:
"El Siete"
Արամ Ներսիսյան, (վիդեո բաժին)
Արամը Realmadrid.am-ի այն անդամն է, ով անցնող տարվա ընթացքում շարժեց ֆան-ակումբի մնացած բոլոր անդամների բարի նախանձը՝ այցելելով Մադրիդ և «Սանտիգո Բեռնաբեու»: Բարի, քանի որ մեր յուրաքանչյուր հանդիպման ժամանակ նա մյուսներին է վարակում իր բարությամբ և անմիջականությամբ, իսկ ընթերցողներին այդ բարությունը փոխանցում է ակումբի լեգենդների մասին պատմող հուզաշատ նյութերով:
«Ամեն տարի այդ նույն օրը, տասներկուսի խփելու հետ միանգամից հազարավոր բաներ են անցնում մտքովս: Իհարկե սիրելի թիմիս հաջողությունները տվյալ պարագայում երկրորդական են դառնում, քանզի կան այնպիսի արժեքներ, առանց որոնց նույնիսկ թիմի հաղթանակները չեն ունենա իրենց փայլը: Ցանկանում եմ «Մադրիդի Ռեալի» աշխարհի բոլոր երեսուն միլիոն երկրպագուներին քաջ առողջություն, հաջողություններ կյանքի տարբեր փուլերում: Հավատացե՛ք, ձեր տոկունությամբ կարող եք վայելել ամեն ինչ, այնպես որ, 2012-ը թող ձեզ տա այնքան առողջություն ու երջանկություն, որ ի վիճակի լինեք վայելել մեր սիրելի թիմի բոլոր հաջողությունները»:
MelIsh
Իշխան Մելքոնյան, (վիճակագրություն բաժին)
Իշխանը, թեև սիրելի ակումբին ժամանակ առ ժամանակ դավաճանում է «կարմիր սատանաների հետ», երկար ժամանակ իր վրա էր կրում կայքի ամենաձանձրալի՝ վիճակագրության պատասխանատուի պարտականությունները և պատվով էր կատարում այն: Նաև նրա շնորհիվ էինք մեր կայքի վերևի աջ անկյունում իմանում, թե հաջորդ անգամ, որտեղ և որ ժամին են մեր սիրելի ֆուտբոլիստներն անցկացնելու իրենց հաջորդ մրցավեճը:
«Շնորհավորում եմ ողջ մադրիդիզմի և մեր կայքի սիրելի այցելուների գալիք Ամանորն ու Սուրբ Ծնունդը: Մաղթում եմ տոնական և ուրախ տրամադրություն ինչպես այս տոնական օրերին, այնպես էլ ողջ տարվա ընթացքում: Թոˊղ որ այս տարին գերազանցի նախորդին իր ձեռքբերումներով, միասին տոնենք մեր սիրելի ակումբի հաղթանակներն ու զերծ մնանք պարտություններից ու հիասթափություններից»: ¡ Feliz Navidad !
Erewanski
Երվանդ Իսմաիլյան, (ֆան-ակումբի երիտասարդական թևի առաջնորդ)
Երվանդը ֆան-ակումբի կյանքն ամեն օր հարստացնում է նորանոր մտքերով ու գաղափարներով, զանազան նախաձեռնություններով և միջոցառումներով: Բայց նա ոչ միայն «ճառ» է ասում, այլև զանգ է կախում, կյանքի կոչելով իր գաղափարները և հաճելի ժամանանցի հնարավորություն ապահովելով մադրիդիստների համար:
«Սիրելիˊ մադրիդիստներ, շնորհավորում եմ ձեր գալիք Ամանորն ու Սուրբ ծնունդը: Մարդկային կյանքը, որքան էլ փորձենք կապել ֆուտբոլի հետ, ունի այլ առաջնային կողմեր: Ամանորը իսկական ժամանակն է մարդկային հույզերի, հույսերի ու սիրո արտահայտման համար: Թող գալիք տարին լինի հաղթանակի, բերկրանքի, սիրո ու հաջողության տարի, առանձնանա նշանակալի առաջընթացներով ու անձնական նվաճումներով: Թող ձեր սրտերում բույն դնեն անանձնական ձգտումներն ու սերը: Երբեք մի դադարեք սիրել, քանզի սերը երջանիկ ապրելու բանաձևն է, դրա համար էլ ցանկանում եմ, որ սերը դառնա ձեզ ուղեկից գալիք տարում: Շարունակեք մնալ մարդ, շարունակեք ձգտել կատարելագործվել ու գալիք տարին միմիայն հաջողություն կբերի ձեզ: Եղեք երջանիկ ու սիրված, գնահատված ու վարձատրված կյանքի կողմից: Շնորհավոր Ամանոր և Սուրբ ծնունդ:
Har8
Հար8 Այնտապյան, (վիդեոէդիթոր)
Հարութը կամ պարզապես Ութը մեր ֆուտբոլային թիմի ամենահամակրելի անդամներից է: Նա մադրիդիստներին ուրախացնում է ոչ միայն խաղադաշտում իր հիանալի գոլերով ու հնարքներով, այլև իր պատրաստած Wallpaper-ներով ու տեսահալովակներով, որոնք յուրաքանչյուր օր էլ ավելի լավն են դառնում:
«Շնորհավորում եմ բոլոր մադրիդիստների Ամանորն ու Սուրբ Ծնունդը, ցանկանում եմ քաջ առողջություն ու երջանկություն բոլոր մադրիդիստներին: 2012 թվականը հաջողակ տարի լինի ձեզ համար և մեր սիրելի թիմի հետ միասին հասնենք նորանոր բարձունքների»:
Madridist
Վանիկ Մարգարյան, (ղեկավար անձնակազմ)
Վանիկը այն մարդկանցից է, ով կանգնած է կայքի հիմնադրման հիմքերում արդեն հեռավոր 2006 թվականից: Չնայած իր սուղ ժամանակին, նա դեռևս կարողանում է ժամանակ և իր իրավաբանական գիտելիքները տրամադրել ի նպաստ կայքի զարգացման.
«Շնորհավոր Ամանոր! Պատմությունը սովորություն ունի կրկնվելու, գալիք տարում սպասենք աշխարհի ուժեղագույնի տիտղոսի վերադարձին: Ամենակարևորը, առողջ ու երջանիկ եղե՛ք»:
Harut
Հարություն Իսպիրյան, (ղեկավար անձնակազմ)
Թվում է, թե Հարութը, ով կայքի անձնակազմից միակն է, ով ընտանիք է կազմել, մեծացնում է իր դստերը, դասավանդում է Հանրապետության լավագույն բուհերից մեկում, աշխատում է լավագույն բանկերից մեկում, պետք է ամենից քիչ ժամանակ ունենար կայքի աշխատանքներին մասնակցելու համար, բայց՝ ոչ: Նա ոչ միայն ամեն օր ուշադրությամբ հետևում և կազմակերպում է կայքի աշխատանքները, այլև, սիրելի կայքի զարգացման գործին նպաստելու համար օրեցօր հարստացնում է իր գիտելիքները ծրագրավորման բնագավառում և կատարում է կայքում անհրաժեշտ փոփոխությունները:
«Թող այս տարի ամանորյա խնդությունը դառնա ամենօրյա ուրախություն: Թող նպատակային քայլերի ու անհոգ օրերի, սիրո և ջերմության, հաճելի անակնկալների և հաղթանակների 366 օր լինի»:
David
Դավիթ Գալստյան, (ղեկավար անձնակազմ)
Կայքի հիմնադիրներից Դավիթը, ով աշխատում է որպես մարզական լրագրող, ժամանակին երազում էր այն մասին, նույնիսկ իր ակտիվ մասնակցության բացակայության պայմաններում տեսնել կայքի անխափան աշխատանքը, այսօր տեսնում է իր երազանքն իրականացած: Այժմ նա կայքի աշխատանքին միջամտում է միայն այն դեպքերում երբ ինչ-որ բան այնպես չէ, փորձում է իր վրա վերցնել խաղաղության աղավնիի ֆունկցիաները ֆան-ակումբում տարաձայնությունների դեպքում, բայց նաև առիթը բաց չի թողնում հնարավորության դեպքում իր հետաքրքիր անակնկալներով ու տարբեր նյութերով հարստացնել կայքի ու ֆան-ակումբի առօրյան:
«Ամենաբարձր ու բարի նպատակներ Նոր տարում և դրանց իրանականացում: Եղե՛ք բարի, վեհ ու առաքինի: Ամեն ինչ արե՛ք Ձեր բնագավառում լավագույնը լինելու համար, լիարժեք ուրախացեք Ձեր հաջողություններով ու ձեռքբերումներով, իսկ անհաջողություններն օգտագործեք միայն սեփական սխալները տեսնելու, շտկելու համար: Հաղթանակներով լի տարի եմ մաղթում»:
REALMADRID.AM 2011
