«Ռեալի» ավագ Սերխիո Ռամոսը «Լևանտեի» դեմ խաղից հետո կարծիք է հայտնել արդյունքի ու թիմի վիճակի մասին։
«Սա այնպիսի խաղ էր, որում թիմն հենց ամենասկզբից պայքարում էր հաղթանակի համար։ Գոլ բաց թողնելուց հետո էլ մենք միանգամից առաջ նետվեցինք, որ գոլ խփենք ու հաղթենք։ Վերջին րոպեին կորցրինք երկու միավոր, որոնք կարող էին փոխել թե մեր տրամադրությունը, թե արդյունքը։ Պետք է խորը վերլուծություն կատարել։ Այն պահերին, երբ թիմը վերահսկում է խաղի ընթացքը, ինչպես առաջին խաղակեսում էր, մրցակիցը կարողանում է մեկ պահ ստեղծել ու գոլ խփել։ Մենք պետք է լուծում գտնենք։ Պետք է ավելի միասնական լինենք ու ավելի ամուր գործենք, երբ հերթը հասնում է պաշտպանությանը։ Հիմա չեմ ցանկանում առանձնացնել խաղային որևէ օղակ»։
«Մենք շարունակելու ենք պայքարել, որ հնարավորինս բարձր տեղ զբաղեցնենք։ Չեմպիոնների լիգան ու մրցաշրջանի մնացյալ հատվածը մեզ պետք է օգնեն, որ փոխենք այս թիմի շարժման ուղղությունը։ Նորմալ չէ, որ այսքան զիջում ենք առաջատարին։ Ինչ-որ բան սխալ ենք արել, որ այդքան շատ միավոր ենք կորցրել այն խաղերում, որոնք վերահսկել ենք։ Սա մեր վատագույն տարիներից մեկն է։ Թիմն աշխատում է, ոչ ոք գլուխ չի պահում, բոլորը հարձակվում են, բայց երբ դժվարին իրավիճակ է, պետք է միասնական լինել, քանի որ դա միակ տարբերակն է, որով հնարավոր է Չեմպիոնների լիգայում արժանապատիվ խաղ ցուցադրել»։
«Մենք հիասթափված ենք, քանի որ այս խաղում վերահսկում էինք ողջ ընթացքը, իսկ ամենավերջում ձեռքից բաց թողեցինք հաղթանակը։ Լավ առաջին խաղակես անցկացրինք, լավ էինք խաղում ու գերազանցում մրցակցին, բայց հենց առաջին պահը «Լևանտեն» օգտագործեց ու գոլ խփեց։ Այսպիսի բան մեկ անգամ չէ, որ տեղի է ունեցել մեզ հետ ընթացիկ մրցաշրջանում։ Պետք է շարունակել աշխատել ու թևաթափ չլինել։ Այս իրավիճակում պետք է ուժեղ ու միասնական լինենք, լավատեսորեն տրամադրվենք, որ կարողանանք բարելավել մեր խաղը։ Հավատում ենք մեր ունակություններին»։
«Մենք շաբաթվա ընթացքում շատ լավ ենք աշխատում, լավ մթնոլորտ է տիրում, ու ամեն մեկն իր ողջ ուժերն է տալիս թիմի համար, դրա համար էլ հիմա հիասթափված ենք, երբ ամեն ինչ մեր նախատեսածի պես չի գնում։ Չեմպիոնների լիգան այլ մրցաշար է, բայց հիմա մենք պետք է նախ պատրաստվենք առաջնության հաջորդ խաղին, ինչից հետո նոր կմտածենք ՊՍԺ-ի մասին։ Երկու խաղերում շատ բաներ կարող են լինել։ Մենք լավ թիմ ունենք ու գիտենք, որ դժվար է լինելու, բայց պետք է ցույց տանք, որ կարող ենք դուրս գալ այս իրադրությունից»։
Los Merengues, Realmadrid.am
