Մատեո Կովաչիչի հիանալի ելույթները Իսպանիայի սուպերգավաթի խաղարկության երկու հանդիպումներում Մարկոս Լյորենտեին մոտեցրել են «Սանտիագո Բեռնաբեուից» հեռանալու դռանը՝ խաղաժամանակ ստանալու ակնկալիքով։
Նախորդ մրցաշրջանում «Ալավեսում» հիանալի ելույթներից հետո «Ռեալի» սան Լյորենտեն վերադարձավ «արքայական ակումբ»՝ ցանկանալով դառնալ Կազեմիրոյի փոխարինողը, բայց պարզվեց, որ Կովաչիչը նրանից առաջ է ընկել։
Զինեդին Զիդանը սուպերգավաթային պատասխան խաղում Կազեմիրոյին թողեց պահեստայինների նստարանին, իսկ Կովաչիչը խաղաց առաջին րոպեներից, մինչդեռ առաջին խաղում խորվաթ կիսապաշտպանը փոխարինում էր իր հայրենակից Լուկա Մոդրիչին, որը որակազրկված էր։
Լյորենտեն, միևնույն ժամանակ, չկարողացավ հայտնվել թիմի կազմում երեք պաշտոնական խաղերից որևէ մեկում ու հիմա մտածում է իր ապագայի մասին, մինչդեռ նրան ձեռք բերել ցանկացողների ցուցակը բավականին երկար է։
«Սևիլիան» ամենից հետաքրքրված ակումբն է այս հարցում, բայց AS-ը հայտնում է, որ «Ատլետիկո Մադրիդն» ու «Արսենալը» ևս դեմ չեն իրենց կազմում տեսնել Մարկոսին։ «Ռեալը» գերադասում է վարձակալությամբ ֆուտբոլիստին հանձնել որևէ ակումբի կամ տրանսֆերի ժամանակ ներառել հետգնման իրավունք։
Կովաչիչը կարողացավ «Բարսելոնայի» դեմ խաղերում ցուցադրած ֆուտբոլով գրավել երկրպագուների սրտերը, ինչի շնորհիվ էլ «Բեռնաբեուն» նրան հոտնկայս ծափահարեց կատալոնացիների դեմ չորեքշաբթի օրը կայացած խաղում։
Նա Զիդանի համար վստահելի մարդ է դարձել, իսկ թվերը ավելի են հաստատում այդ փաստարկը. Կովաչիչի՝ ակումբի կազմում անցկացրած 75 խաղերից ընդամենը 4-ում է թիմը պարտվել, իսկ բոլոր այն 38 խաղերում, երբ Մատեոն մեկնարկային կազմում է եղել, թիմը ոչ մի խաղ տանուլ չի տվել։
Los Merengues, Realmadrid.am
